Ice Golewala Poem - आला आला गोलेवाला

 

आला आला गोलेवाला

आला आला गोलेवाला 

गोला घेऊ चला चला,

वाट  पाहे  सर्वजण

थंडगार  छान गोला.

बर्फगोला आहे  गोड

वेगळाले रंग त्याचे,

लाल, हिरवा ,पिवळा 

रूप  खुलवी  गोल्याचे.

गोलेवाल्याकडे  मिळे 

लिंबू  सरबत छान, 

लिंबू सरबत पीता 

भागे आमची तहान.

उन्हामध्ये  गोळा होती

सान, थोर  सारेजण,

थंडगार   बर्फगोला

खाता  तृप्त झाले  मन.

ग्रीष्म ऋतु कविता

 ग्रीष्म ऋतु 

 ऋतू वसंत संपता,

 ग्रीष्म ऋतु सुरुवात. 

लख्ख प्रकाश सूर्याचा,

  तेज  प्रखर  नभात.

 उष्णतेने तापे धरा,

 उन्हाळ्याच्या दिवसात.

 तृण  वेली  करपती, 

 तप्त उन्ह  तडाख्यात.

 नैसर्गिक  जलस्त्रोत, 

 आटलेले  धरेवर.

 प्राणी  पाण्याच्या शोधात,

 पशु, पक्षी   सैरभैर.

 भर  दुपारी  उन्हात, 

जीव  शोधितो  सावली.

थंडगार पाणी पिता,

मिटे जीवाची काहिली. 

पाणी टंचाई सामना,

ठरलेला उन्हाळ्यात.

पेटे  वैशाख वणवा,

रानमेवा हा रानात.

 पहाटेच्या प्रहराला,

  देई  मोगरा  सुगंध.

  आमराई   बहरून,

  वनी  दरवळे  गंध.

वाट पाही बालमन

आतुरता  उन्हाळ्याची,

सुट्टी लागता शाळेला

ओढ मामाच्या गावाची